Kompensashon pa donashon di sélula madre

Un di e prinsipionan mas importante di donashon di sélula madre ta ku semper ta boluntario i, p’esei, no ta pagá. Esaki ta stipulá legalmente pa garantisá e seguridat di tantu e donadó komo e pashènt. Esaki ke men, entre otro, ku komo donadó di sélula madre bo no por haña ningun benèfishi material den plaka òf den forma di produkto pa e donashon.

Reembòlso di gastunan

Si bo mester hasi gastunan en relashon ku e donashon, naturalmente nan ta wordu reembolsá. Pensá na: gastunan di biahe, gastunan di estadía na Hulanda, ausensia di trabou, etc. Ademas, ta tambe posibel pa trese un miembro di famia òf un persona konosí huntu ku bo pa Hulanda komo akompañante durante e periodu di donashon. Tur gastunan ku bo komo donadó ta hasi en relashon ku e proseso di donashon, mas e gastunan pa un akompañante, ta wordu kubrí.

E kompensashon pa esaki nos ta regla den konsultashon ku bo i di un manera razonabel. Nos ta pidi bo pa warda tur resibunan i manda nan huntu ku bo deklarashon.

Seguro

Tur akshonnan médiko ku ta tuma lugá den hospital na Hulanda ta kai bou di e seguro di responsabilidat di e hospital i e seguro adishonal pa komplikashonnan di donadó di Stichting Matchis. Tur gastunan ku ta wordu hasi durante un donashon ta wordu pasa via Stichting Matchis na e seguro médiko di e pashènt pa kende bo ta doná. Asina bo propio seguro di salud lo no wordu usa.