Pakico bira un donante di stamcel?

Importancia di e stamcelnan saludabel 

Den e beenmerg ta haya e stamcel cu ta responsabel pa produci diferente celnan di sanger. E celnan di sanger ta necesario pa: 

• Transportacion di oxigeno
• Combatimento di e infeccionnan 
• Prevencion di sangramento 

Cerca un pashent cu tin un enfermedad di sanger grave, e proceso aki ta keda stroba y cu ta pone e pashent su bida den un situacion di peliger.  

Ta trata e pashent cu un dosis di kimoterapia of radioterapia asina halto, cu ta daña e beenmerg di un manera ireversibel. No ta trata djis di destrui e celnan malo, sino tambe di e bon celnan di sanger. E stamcelnan saludabel di un donante ta importante pa dos motibo:  

1. Door di un transplante di stamcel, e pashent ta haya stamcel cu ta funciona bon, cu ta cuminsa produci e celnan nobo di sanger.
2. Si ainda e pashent tin algun sobra di tumor of cel di cancer den su curpa, e celnan di e donante por ataca y destrui nan.  

Asina, abo como donante di stamcel ta duna un pashent e oportunidad pa cura completamente di e enfermedad.  

Oportunidad riba un compatibilidad 

Un pashent no por haya stamcel di cualkier persona. Ta hopi importante cu e tipo di tehido (HLA) di e stamcel di e donante ta cuadra mas tanto posibel cu esun di e pashent. Si e curpa di e pashent considera e stamcel como algo straño, por surgi complicacion serio of hasta fatal.  

E chens mas grandi di compatibilidad ta entre ruman. Toch solamente 30% di e pashentnan ta haya un donante adecua den nan propio famia. Esey kiermen cu un gran parti di e pashentnan ta depende di un donante pafor di nan circulo familiar. Etnicidad ta hunga un rol importante pa haya un compatibilidad. P’esey e pashentnan ta busca den e base di dato mundial di donante di stamcel.     

E chens cu abo ta compatibel cu cualkier persona na cualkier parti di mundo, ta masha chikito. P’esey pa haya un donante adecua pa cada pashent, ta importante pa tin un cantidad grandi di donante di e stamcel registra rond mundo.  

Necesidad pa hopi donante hoben  

E edad di e donante tambe ta hunga un rol importante. For di investigacion ta resulta cu e chens di recuperacion pa e pashent ta mas grandi, ora e stamcel ta bin for di un donante hoben.  

Descendencia Mixto 

Pa e pashentnan di descendencia no Occidental haya un donante di stamcel adecua, ta hasta mas dificil. Esaki ta asina door cu riba nivel mundial, relativamente poco hende di origen no Occidental ta registra como donante di stamcel. Mescos ta conta pa e donantenan di descendencia mixto.  

Hopi biaha e descendencia di e donante y pashent ta coresponde cu otro. Por ehempel, si un pashent tin origen Africano, e chens di ta compatibel cu un donante cu tambe ta di origen Africano ta mas grandi. Pa yuda e pashentnan aki, ta hopi importante tambe cu mas hende di origen mixto of no Occidental ta registra como donante di stamcel.