Compensacion ora di donacion di stamcel

Un di e principionan mas importante di donacion di stamcel ta, cu semper e ta boluntario y p’esey no ta paga p’e of duna compensacion. Esaki ta legalmente regla pa garantisa e siguridad di tanto e donante como e pashent. Esaki ta nifica, entro otro, cu abo como un donante di stamcel no por ricibi ningun beneficio material, ni den forma di placa ni den forma di regalo of servicio, como un recompensa pa e donacion.

Compensacion di gasto 

Si bo mester haci gasto relaciona cu e donacion, naturalmente e gastonan ey lo haya compensacion. Pensa riba por ehempel, e gastonan di biahe, e gastonan di estadia na Hulanda, ausencia na trabou y otro gasto necesario relaciona cu e proceso di donacion. Ademas ta posibel pa un familiar of un persona di confiansa of conoci compaña bo pa bay Hulanda durante e periodo di donacion. Tur e gastonan cu abo como donante haci rond di e proceso di donacion, como tambe e gastonan pa un acompañante, lo haya compensacion. 

E compensacion pa esaki nos lo regla den consulta cu bo y di acuerdo cu loke ta razonabel. Nos ta pidi pa bo warda tur e recibonan y manda nan cu bo declaracion di gasto.

Seguro

Tur tratamento y procedura medico cu tuma lugar na Hulanda, ta cay bou di seguro di responsabilidad di e hospital y e seguro adicional pa complicacion di donante ta cay bou di Stichting Matchis. Tur gasto relaciona cu un donacion, ta procesa pa Stichting Matchis na e asegurado di salud di e pashent, di esun cu abo ta haci donacion. Esaki ta nifica cu bo mesun seguro medico no mester cubri ningun gasto relaciona cu e donacion.