Con e donacion di stamcel ta funciona?

Den aproximadamente 85% di e casonan, e stamcel ta via sanger (conoci como donacion PBSC). E dokter di e pashent ta scoge e metodo di tratamento. Como preparacion pa esaki, ta inyecta bo pa cinco dia un remedi (G-CSF), e ultimo inyeccion ta administra mainta trempan prome cu e donacion. Esaki ta stimula e produccion di mas stamcel, cu despues ta drenta den e circulacion di sanger. G-CSF ta un substancia di curpa propio, cu normalmente ta produci ora bo tin griep.  

Riba e dia di donacion ta saca e stamcel for di sanger cu un aparato aferesi (un procedura medico cu ta elimina e componentenan specifico di sanger). E aparato aki ta filtra e stamcel for di sanger y ta duna e sanger bek na e donante via un infusie. Den transcurso di algun ora, ta colecta suficiente stamcel. Den 72 ora ta transporta y administra bo stamcel pa e pashent (na cualkier parti di mundo).  

Administracion di G-CSF por duna un efecto secundario manera un sintimento di griep. Algun donante ta experencia un sensacion doloroso y fastioso den e parti abou di lomba y den e bilnan, esey ta bin di e produccion di e stamcelnan extra. E efectonan secundario aki ta inofensivo y por lo general ta disparce un dia despues di e coleccion di stamcel. Sinembargo bo lo por sinti cansa pa algun dia.  

Tin biaha ta mihor pa un pashent haya e stamcel directamente for di e beenmerg. E dokter cu ta trata e pashent ta dicidi riba e metodo di tratamento.  

Haci donacion di stamcel for di e beenmerg, no ta haci niun dolor, ya cu e donacion semper ta sosode bou di narcosis general.    

E proceso di coleccion no ta complica. Mainta ta warda bo den e centro di coleccion y ta pone bo bou di narcosis. 

Cu un hangua diki ta saca e stamcelnan for e rand patras di e pelvis (bekken). Esaki ta e weso cu uno por sinti na e parti ariba di bo bilnan. E bekken ta rico den beenmerg. E ta un weso grandi y fuerte, for di cual por saca algun beenmerg facilmente. Durante un donacion di beenmerg ta colecta aproximadamente 4% di e cantidad total di stamcel. 

Despues di e donacion, bo por sinti un sensacion di dolor of dolor den e musculonan den e parti abou di lomba. Por lo general e sintomanan aki ta disparce den 14 dia. Tambe por pasa cu temporalmente bo ta sinti bo mas cansa despues di haci esfuerso fisico. Door cu e beenmerg den pelvis (bekken) tin hopi circulacion, e coleccion di beenmerg tambe ta saca un cantidad relativamente grandi di sanger, te cu un liter. Esaki por causa un anemia leve. E curpa ta recupera e deficiencia rapidamente y e anemia ta disparce despues di algun siman.  

Paso 1: Compatibilidad potencial  
Si abo ta un compatibilidad potencial, un trahador di Matchis Nederland ta tuma contacto cu bo. Nos lo purba esaki prome via di telefon y si no logra yega na bo, nos lo laga un voicemail y manda un mail. Durante e prome combersacion aki nos lo informa bo mas cu ta posibel tocante con e donacion lo ta y tambe ta yena un lista di pregunta medico. Nos ta puntra tambe di biaha si bo kier haci donacion ainda y/of si tin cualkier vakantie planifica cu nos mester tene cuenta cu ne.  

Paso 2: Sacamento di sanger  
Despues di e combersacion telefonico aki, nos ta pidi bo pa saca algun tubo di sanger. Ta colecta e tubonan di sanger aki na hospital na Aruba y despues nan lo percura pa manda nan pa Matchis Nederland.  

Paso 3: Tempo di wardamento  
Na momento cu bo sanger yega na Matchis Nederland, ta analisa esaki mas profundo. Por ehempel, lo realisa un di dos tipificacion HLA mas amplio pa controla si realmente bo ta compatibel. Tambe ta check e sanger pa cierto virus manera hepatitis y HIV. Por pasa cu tin varios compatibilidad potencial pa e pashent cu nan ta yama abo. E centro di transplante di pashent mester mas tempo pa tuma e mihor decision. E wardamento ta aproximadamente tres luna.   

Paso 4: E mihor compatibilidad  
Si resulta cu bo ta e mihor opcion di compatibilidad pa e pashent, Matchis Nederland lo tuma contacto cu bo pa planea un fecha y metodo pa e coleccion. Ademas nos lo planea un examinacion medico amplio y un combersacion cu nos dokter di donante. Bo kier lesa mas tocante exactamente con nos ta investiga si abo ta e mihor opcion di compatibilidad?  Klik aki.  

Paso 5: Examinacion medico & combersacion informativo  
E examinacion medico ta sosode parcialmente online cu un dokter na Hulanda y parcialmente na hospital na Aruba. Tin biaha ta posibel cu e examinacion ta keda haci completamente na Hulanda. 

Durante e examinacion medico, entre otro cos, nos ta test bo presion di sanger, ta analisa bo urina y nos ta haci un ECG y un radiografia di pulmon. Bo sa e ora di biaha si bo ta completamente saludabel! Ademas, nos lo tin tambe un combersacion profundo cu bo, unda lo discuti e bentaha- y desbentahanan di donacion di stamcel y tambe e posibel efectonan secundario riba largo plaso. Tambe nos lo discuti cual metodo di coleccion abo, como donante, lo prefera y no lo prefera. 

Paso 6: Preparacion riba donacion di stamcel  
Si bo ta haci donacion di stamcel via sanger, bo mester administra un factor di crecemento dos biaha pa dia durante 4 dia prome cu e donacion di stamcel. Esaki yama G-CSF y ta percura cu mas stamcel ta drenta den e circulacion di sanger. G-CSF ta un substancia propio di curpa cu normalmente ta produci ora bo tin griep. 

Como cu e donacion real di stamcel ta sosode na Hulanda, bo lo bin Hulanda seis dia prome cu e fecha di donacion. Cinco te shete dia despues di e donacion, bo por bay cas bek. Bo lo ta na Hulanda pa aproximadamente dos siman.  

Si bo ta haci donacion di bo stamcelnan via beenmerg, ta conta cu bo presencia mainta trempan di e dia di donacion. Ta yena un cuestionario cortico y ta saca varios tubo di sanger. Donacion di beenmerg tambe ta tuma lugar na Hulanda. Pa esaki, bo ta bin Hulanda un pa dos dia prome cu e fecha di donacion y aproximadamente despues di shete dia despues di donacion, bo por bay cas bek.  

Paso 7: E donacion  
E momento a yega! Awe ta e dia cu bo ta haci donacion di stamcel. Esaki lo sosode na un di e siguiente maneranan: via sanger of via beenmerg. Bou di e siguiente tab bo ta lesa con cada metodo di donacion ta funciona.  

Despues di e donacion, nos lo haci follow-up telefonicamente na diferente momento, pa controla con bo ta sinti. Despues di cuater siman, nos lo controla bo cantidad di sanger, pa wak si bo beenmerg a recupera completamente. Pa e control aki bo por laga haci un examen di sanger na Aruba, no tin mester di biaha pa Hulanda.  

E dokter cu ta trata e pashent ta scoge cua metodo ta e mihor opcion pa su pashent. Como e donante, ainda bo por duna bo aprobacion riba e metodo scogi; donacion di stamcel semper ta boluntario. Si bo no ta di acuerdo cu e preferencia di e dokter concerni, esey ta nifica cu bo no lo ta e donador pa e pashent specifico ey.  

A base di e historia medico y e tipo di pashent, ta determina cua manera di donacion ta e mihor pa e pashent. Entre e dos tipo di donacion (via beenmerg y via sanger), tin un diferencia den caracteristica di e donacion di e ‘producto’ final. Door di e diferente caracteristicanan aki, e efecto di e producto di stamcel den e curpa di e pashent ta varia dependiendo di e metodo di donacion.  

Diferencia 
Donacion via sanger ta contene hopi stamcel, loke ta haci cu e transplante por bay mas liher y cu e stamcel nobo ta produci cel di sanger nobo mas liher. E producto ta contene tambe hopi cel blanco di sanger, cu por tin un efecto anti-leukemia. Un desbentaha di e cel blanco di sanger aki ta, cu nan por causa rechaso tambe. Esaki ta nifica cu e celnan di e donante por cuminsa ataca e curpa di e pashent.  

Donacion di beenmerg ta contene menos stamcel y menos cel blanco di sanger, pero tambe ta contene otro substancia di sosten, cu ta haci cu e producto ta duna mihor resultado pa cierto cuadro di enfermedad. Na e momentonan aki ta uza donacion di beenmerg pa cierto cuadro di enfermedad (por ehempel Anemia Aplastico). Tambe tin un preferencia fuerte pa producto di beenmerg, ora e pashent ta un mucha.   

Banda di e preferencia di dokter di tratamento di e pashent y di e donante mes, e dokter di e donantenan tambe tin bos den e forma di donacion. Si un donante no ta adecua pa cierto forma di donacion, por scoge den deliberacion pa un otro metodo di donacion, hasta si esaki no tabata e opcion di preferencia di e dokter di tratamento di e pashent.  

Tur gasto relaciona cu donacion di stamcel ta cubri pa e seguro di e pashent. E gastonan di biahe y estadia na Hulanda ta cubri pa Matchis. Bo no ta ricibi compensacion pa e donacion mes, esey ta stipula pa ley.  

Donacion di stamcel via sanger 

E efectonan secundario di G-CSF 
Administracion di e factor di crecemento G-CSF por causa dolor di weso y musculo leve pa modera como un efecto secundario, cual ta tratabel cu paracetamol. Tin biaha ta presenta un sintimento di griep cu cansancio y eventualmente un keintura leve y dolor di cabes. Algun donante ta raporta, cu durante di e uzo di G-CSF, nan ta drumi menos bon of ta haya un keintura leve. Raramente ta presenta efecto secundario manera nausea, sodamento anochi y mareo. Tambe den bes en cuando por tin iritacion na e lugar di inyeccion. Generalmente e sintomanan ta disparce dentro di un pa dos dia. Un di e efectonan secundario di G-CSF ta, cu e por empeora e kehonan di enfermedad auto-inmunologico, astma y alergia.  

E efectonan di G-CSF riba termino largo  
Riba termino largo, te ainda no tin ningun efecto negativo conoci di G-CSF.  Investigacion a enfoca principalmente riba un chens mas halto riba enfermedad, manera cancer. E donantenan saludabel ta uza e substancia aki, pa e meta aki, for di comienso di e añanan nobenta.  

E efectonan secundario di coleccion di stamcel via e sanger  
E donacion di stamcel via e sanger por dura te seis ora. Durante varios ora, un parti di e sanger ta circula constantemente via e mashin. Pasobra e sanger ta fria pafor di e curpa y bo por haya friu. Den e caso ey, un deken por yuda. Na momento cu ta acumula e stamcel den e mashin, por bin plaketa tambe acerca. Door di esey e cantidad di plaketa den e curpa por baha. P’esey tanto prome como despues di e acumulacion, ta controla e cantidad di plaketa. Normalmente, e nivel di e plaketanan no ta baha asina tanto, unda esaki por causa problema. 

Donacion stamcel via e beenmerg 

Ta haci dolor?  
Donacion di stamcel for di beenmerg no ta haci niun dolor, e donacion ta haci semper bou di anestesia general. Cu donacion di beenmerg, e riesgonan standard di anestesia ta e riesgo di mas grandi, cu e forma aki di donacion di stamcel. Despues di recuperacion di e anestestia, bo por sinti un tiki marea ainda. Tambe bo por sinti cu pa motibo di e tubo di respiracion, bo ta sinti un sensacion di iritacion den garganta of hasta dolor di garganta. Normalmente, e kehonan aki ta disparce den algun dia. Dolor di cabes y/of mareo tambe por presenta. E kehonan aki generalemente ta disparce e siguiente dia. 

Coleccion 
Ta saca e stamcelnan cu un hangua diki for di e rand mas patras di e pelvis (bekken). Den e prome dianan bo por sinti un sensacion di golpi y dolor riba e lugar unda a prik den e pelvis (bekken). Esaki ta bon tratabel cu paracetamol. E dolor ta bira menos despues di algun dia, pero tin biaha e por dura algun siman, prome cu  dolor disparce completamente.  

Anemia 
Door cu e beenmerg den pelvis (bekken) tin hopi circulacion, e coleccion di beenmerg tambe ta saca un cantidad relativamente grandi di sanger, te cu un liter. P’esey por surgi un anemia leve. Esaki por ocasiona cansancio. E beenmerg y sanger cu ta colecta, rápidamente e curpa ta reemplasa esaki y despues di algun siman e anemia ta disparce. Si ta necesario, e tabletnan di hero por yuda.